“حبيبة…أم زوجة…أم عاشقة ” كلمات الشاعر /د. علي مسلم عجمي

حبيبة…أم زوجة…أم عاشقة

كلمات الشاعر /د. علي مسلم عجمي

قالت يا شاعر نُص عمري ذاب
بحبو حبيبي و أنا بالحُب غرقاني
طيفو ولا مرة عن عيوني غاب
و نار المحبة لَحَد اليوم شعلاني

صدفة افترقنا و أنا مش عارفة الأسباب
و شو اللي جرى بيناتنا من غَدِر و خياني
بلمحة بَصَر بالشك و السرساب
بعَكِس نبض القلب دارت إسطواني
تزوجت غيرو و زواجي من حبيبي خاب
و بحِس حالي بحبيبي بعد علقاني
يا ريت يا شاعر لولا يبرم الدولاب
و يرجع حبيبي إلي و ما يعود ينساني

ما بحس عندي عزوجي غيرة الأحباب
حتى و بجنبو ما عندي شوق عشقاني
زوجي و ما بعرف مين زوجي جاب
و حطَّم حناني و سرق آهات أشجاني
زوجة لزوجي صرت لكننا أغراب
بيني و بينو مسافة حب إنساني

للشوق محتاجة و غزل للعاطفة لهَّاب
لكلمة بحبِّك انا للحُب هيماني
و أشعار عشق ونغم عا لحنها ينساب
نسمات تكرج على الخدين غشياني
و تِبعَت رسايل وَلَه مع شجرة اللبلاب
حب و غرام و كلام دموع ملياني

مدري و ما بعرف ليش صرنا قراب
و بحس إني بشعِرك صرت ولهاني
معقول يا شاعر إلك إزداد بالإعجاب
و ترجِم كلام الهوى مواويل و غناني
و افتح إلك عا بيت قلبي الباب
و إسكَر من الشعر المميز بالغزل
و انسى حبيبي .و حبيبي تصبح التاني

الشاعر د. علي مسلم عجمي
لبنان