” رفقا بقلبك “

كتبت -مياده خالد

_ هنبعد ؟

_ لا طبعا ، إنتي روحي ، حد يفارق روحه ؟

اتنهدت ودخلت ع الاوضه لبست دبلتي من تاني ، بصيت لشكل الدبله ف إيدي وإبتسمت بفرحه ، أنا بحبه لكن دايما بكون محتجااه يطمني ، يقولي أنه لسه بيحبني ، يحسسني إن وجودي فارق ..

إكتشفت إن الإنسان ساعات أقصي طموحه بيوصل لكلمه يتمناها ، لبسمه لطيفه تمحي همومه ، معقوله حياتنا هتقف ع كلمه !

مر أول شهر ف جوازنا بين مناوشات كتيره ، لسه مش قادرين نفهم بعض رغم الحب اللي بينا ، إفتكرت أمي وهي بتقولي ” الراجل ميحبش الست العنيده وميحبش اللي تجادل ، قولي حاضر ونعم واللي تشوفه وبس ، خليكي حلوة ف عيونه ومطيعه ” ..

فهمت كلمتها ، يمكن معظم خناقاتنا كانت بتبدأ بنقاش

_ تحبي نخرج ؟

_ اللي تشوفه ..

_ مش هأخر ف الشغل النهارده ، حاولي تعملي الغدا بدري

_ حاضر

حسيت إحساس غريب من نحيته ، طبعه غلب عليه الهدوء ، حسيت أنه حد جديد ، هو فعلا شخص متحكم ؟

_ ممكن نتكلم ؟

_ أكيد

قعدت جمبه واستنيته يتكلم ..

مسك إيدي بحنيه ، وقرب مني ..

_ ممكن أفهم مالك ؟

ابتسمت ولسه هتكلم فقاطعني ..

_ متقوليش أن مفيش حاجه ، ومتقوليش أنك كويسه ، عايز أعرف ليه اتغيرتي ! فين رأيك ونقاشاتك وجدالك اللي مبيخلصش ، كل التفاصيل دي وحشتني معاكي !

_ الراجل مبيحبش الست اللي بتجادل ..

_ أنا بحبك ، بحب جدالك وعندك ، بحبك بكل طباعك ، مين قال أن الراجل بيحب الست ضعيفة الشخصيه ؟

_ الكل قالي كده ، هي دي الحقيقه ، والدليل أن طباعك بقت أهدي كتير من الأول

_ لا مش حقيقه ، أوعي تسمعي كلام حد ، أنا اللي معاكي دايما وإنتي اللي جوا قلبي ، إحنا بس اللي قادرين نحدد ازاي نتعامل مع بعض ، خليكي عارفه أن أي طرف تالت ف العلاقه بيدمرها لأن محدش هيفهم التاني غير اللي بيحبه وبس ،كل الحكايه إني حبيت أسيبك فتره تجربي وتشوفي هحب كده ولا لا ، ولو فكرتي أني حبيت الأسلوب دا تبقي غلطانه ، مينفعش رجولتي تبقي ع حساب كسرتك ، لا أنا سي السيد ولا انتي أمينه ، أنتي الست وأنا الراجل ، حياتنا مشتركه عشان نعرف نكون سعداء ، حياتنا تبادل آراء ، حياتنا ماشيه بيوم أنا صح ويوم إنتي اللي صح ، فهمتي ؟

_ يعني أيه ؟

_ يعني الحياة مشاركه وود وموده ورحمه وتفاهم ، يعني بحبك بطبيعتك ، بعنادك ، بنقاشاتك ، بجدالك ، بعيونك القمر دول ، بشعرك الجميل ده ، بقلبك الطيب ده ، بكل حاجه فيكي ..

_ اممممم ، بجد ؟

_ طبعا .. ها نخرج ؟

_ هتجيبلي أكل ؟

_ امممم موافق

_ وشيبسي ؟

_ موافق

_ وأيس كريم ؟

_ موافق

_ اممممم وإندومي صح ؟

_ بقولك أي أنا أصلا بحب الستات اللي بتقول نعم وحاضر ومش بتناقش ولا بتجادل ولا هي فيمينست ولا بتخرج وأه أنا سي السيد ويلا امشي

” الجنون بجانب أحدهم يحبك بصدق هو أفضل مايمكن أن تمتلكه من العالم بأكمله ، النقاشات بجنون ، العناد الملئ بالمحبه ، تفاصيل يكمن بها رزق من الله .. فهنيئا لمن يمتلكها