لا تسكثروا نعم الله على عباده

الكاتبة –  إيناس يوسف

عُمر مافي حاجة بتيجلنا بالساهل و ربي!

كل حاجة، و أي خطوة، وأي شغل، و أي حاجة بتشوفوا
الواو، و يا بختك و يا سلام اشمعنا هو… و شوف عامل إزاي و لابس إيه.. هو إزاي قوي كده و قام بسهولة من مصيبة او كارثة بتهدنا كلنا… إيه ده بيضحك… إيه ده قادر يكمل
ياه ده حلو في الشكل، و متفوق، و شاطر في كل حاجة
إيه ده بيخرج و بيتفسح… مش شايل للدنيا هم يا بخته

لأ يا سادة يا كرام ده الصورة الظاهرية اللي انتوا شايفنها
عارفين ورا الكواليس في حُزن أعمق مما تتخيلوا
في دموع كل يوم شلالات… في تفكير ما بيبطلش
في رضا من القلب و ثقة بالله مالهاش حدود
في صبر زي ما بتقولوا كده صبر السنين
أمل و تفاؤل… قصادهم ناس سلبيين محبطين
لو مشيت ورا كلامهم هتدمر نفسيا و عمليا
تعثر… وفقد…ومرض… و قلق… و توتر
في ناس حرفيا شعرها بيوقع… في ناس
بيجلها قولون عصبي… و صداع مستمر
في ناس بتجلها جلطات و ما بتشتكيش
و بيعمل عمليات و لا عمره قال لحد
و لا بتطلع تقول أنا مريضة او عندي كارثة
أو مصيبة… أو… أو…. أو….في ناس ربنا
خلقها كده مش بتحب تظهر تعبها
في ناس معندهاش رفاهية الإنهيار

بالله عليكم بلاش نستكتر على حد حاجة بيوصلها
، او ناجح و متفوق فيها… بلاش تستكتروا نعم ربنا
اللي وهبها لعباده عشان هو الوحيد اللي مطلع على
العبد ده و عارف يستحقها و لا لأ.

لو مش هتعرف تدعيله دعوة حلوة من قلبك إن ربنا
يزيده من فضله و نعمه، و بالخير و البركة في حياته
يبقى ما تبصش ليه سيبه في حاله الله يكرمك