فتش عن الدين…….. يا عزيزي

بقلم – عماد إبراهيم

قولتلكم ايه
الدين …
هو ضربلك الدييييين

زمان واحنا صغيرين
لما كنا نبقي صايمين ونشرب سهواً
نقعد خايفين اليوم كله احسن نكون فطرنا
والاهالي تقعد تهدي فينا
والله صيامكم محسووووب ماتخافوش

الحالة دي من الخوف من ربنا
كفيله انها تحبط اي مخطط
او انها تمنع اي جريمة
لانه دايما في عقلك وقلبك
بتفكر ألف مرة لحد ما تغضبه
حتي لو غلطت لان احنا مش ملايكه
بس دايما في خط كده بتحطه لنفسك
حتي لو بغلط بس انا برضو مازال خوف ربنا في قلبي

اتلعب علي الحته دي حوالي 35 ولا 40 سنة
من نص التمانينات كده
وبدأنا نشوف فكرة …. الدين مش اسلوب حياة
الدين هواية او حاجة كده موجودة وخلاص

وعشان الموضوع دا يثبت في دماغك الناس
ويتقبلوه
بدأ يحط مسميات للحرام
يعني الرشوة … سموها إكرامية
و النصب .. سموه فهلوة
والسرقة .. حللوها ان صاحب المال ظالم ووحش

لكن هنا بقي … كان فاضل أهم حاجة
الجنـ..ـس
نعملها ازاي دي بقي …
الجـ .ـنس دا محرماته واضحه وضوح الشمس

بس .. استني انت بقي
انا هاعملك ميكس حلو

انا الاول هاقعد اجيبلك ناس مجهولة يتكلموا بإسم الدين .. يقوللك ان مفيش حاجة قاطعة
في رأي بيقول ورأي بيقول ورأي بيقول
و ابتدي اجيبلك ناس تبع الإسلام الأمريكاوي
ونتجادل …

هو تقبيل الزوجة في نهار رمضان حلال ولا حرام
هو العلاقه في نهار رمضان حلال ولا حرام
هو الصيام مش المفروض صيام اكل وشرب بس
يعني العلاقة وشرب السجاير عادي !!

من ناحية تانية بقي
هاجيلك انا بشبكات إنتاج كاملة
تعمل افلام تروج للمـ…..ـثليين
افلام للكبار وافلام كرتون كمان
عشان الناس تتقبلهم
بعيد عن الحراااام والحلااااال

واعملك مواقع إبـ……ـاحية
بيتعرض فيها افلام تبيح كل شئ
بما فيها ما حرمه الله زي إتيان الزوجة من الدبر
والراجل والست يشوفوا الكلام دا
يعجبهم اوي
ويبتدي يبحث
فيلاقي مواقع بقي بتدخله من النفس المدخل
ان في رأي بيقول ورأي بيقول
ومادام الحاجة فيها اكتر من رأي
يبقي تحتمل الحدوث
وفجأة تلاقي زوجات طالعه تصرخ في البرامج
جوزي عاوزني اعمل حاجة حرام وهايطلقني لو رفضت !!!

بعدها نوصل لمرحلة تلميع المحرمات
زي مشهد الست اللي خانت زوجها مع ٦٠ راجل في مسلسل اشغال شقة .. وكانت بجحه وبتقول انها ماعملتش حاجة غلط وان دا عادي !!

بعد كده بقي بتوصل لليڤل الوحش
مفيش ربنا في قاموسك
انت نسيت اصلا ان في ربنا
اتحاصرت يا معلم
مخـ…..ـدرات
جهل
تشكيك في الدين
مواقع إبـ…ُاحبة
تحليل للحرام وللسرقة وللنصب
فبتوصل لمرحلة ان ربنا بيحط غلاف علي قلبك
بصيرتك بتبقي خلاص إتعمت

فتلاقي بقي اللي بيوصل بيه الحال انه وهو عن يقين عارف ان دا عاااادي
انه يعمل تبادل زوجات
وتلاقي قضايا .. القبض علي 20شخص بيبدلوا الزوجات مع بعض !

وبالمناسبة في مسلسل اجنبي اتعمل
نزل علي المواقع في عالمنا العربي !!!!
فكرته كلها انه بيقنعك ان تبادل الزوجات شئ عادي
وانه ضد الملل وبيقوي الزواج !!

وهوب توصل بقي ان عقلك يقولك عااادي انك تعتدي علي ط………فلة
ليه؟ مش بس لانك نسيت ربنا
بس ارجع للاسباب اللي فوق
لان في مواقع بتعرض افلام فيها كده
فانت كتر فرجتك عليها بيحولك انك عاوز تجربه وانه هايبقي عادي وان البنت في الفيلم ماحصلهاش حاجة
مايعرفش ان الافلام دي بيقف وراها شركات انتاج و كاميرات وتصوير عشان يطلعلك الشكل اللي بتشوفه .. لكن ورا الكاميرا في كوااااارث

وبالمرة بقي تبقي ماشي في الشارع في نهار رمضان
تلاقي الواد والبت ماشيين إيديه علي كتفها
وماسكين البيبسي عادي !!! ( ماتقولش مابيحصلش )

وبالمرة بقي .. في نهار رمضان
تركب الميكروباص تلاقي السواق في ايده كوباية الشاي والسيجارة ( ماتقولش مابيحصلش )

وبالمرة بقي في نهار رمضان
تبقي واقف عمال تسمع سـ..ـب الدين من كل اتجاه
سواقين و صنايعية وشباب روش طالع من الكورس
في الخناقات بيسـ..ـبوا الدين
وفي الهزار والروشنة بيسبـ…ـوا الدين

تعليقي دا كله
عشان بس قريت خبر
ان المسعور اللي اعتدي علي طفـ…ـلة العاشر من رمضان
طلب من مراته اقامة علاقه في نهار رمضان
ولما هي رفضت دا
نزل الشارع يدور علي اي حد !!!

ربنا يسترها علينا والله
احنا في زمن وحش اوي