د. محمد ضباشه يكتب ” أحمر شفايف”

أحمر شفايف

محمد ضباشه

أحمر شفايف ولايف ع الخدود ألوان
يمسح دموع الزمن يدفن آهات ما تبان
يِسُر كفيف العقل واللي بنص لسان
مَن ظن ورا عشبها جنات نعيم صافي

عوافي يا اهل النظر يا مشقلبين الحال
يا مصورين إنها عايشه فى أحسن حال
وأن جَمَالْهَا جِمَال ترمي الربيع لعيال
تايهين على شطها ويا أمل حافي

نقوا بقايا الخريف ونظموا أبيات
اللي رسم خصرها ويا الفساد بيبات
واللى رسمهاعَلَم عَلِّم ولادنا سكات
واللي رضى وانخرس ويا هلع كافي

فكوا قيود عقلكم وما ترسموها زيف
ولا بفعل الهوى تلونوها كيف
حاسين جمالها بهت والليل معاها مخيف
لكن جسور حبنا فيها الأمل شافي

ما تخافي يا كلهم يا شمس ولادة
وطول ما فيكي العزم والطلق والعادة
بكرا تجيبي قمر والطرح بزيادة
للى برضاه انحرم والكرسي قال ما في