البذرة الطيبة في وسط الأرض البور

كتب – عماد إبراهيم

لا إعلانات … ولا دعايا بملايين
لا شراء لايكات ومشاهدات
ولا خناقات علي مين الأول ومين المكتسح
بهدووووء خالص و بوجه مملوء بالطيبة
يخرج سامح حسين عشان يقدم حاجة كده
أقل ما يقال عنها انها كبسولة راحة نفسية

اتكلمت قبل كده كتير عنه
وعن تصميمه انه يقدم فن كويس ومحترم وهادف
وقلت كتير ان دا سبب خلي سامح حسين مايقدمش أعمال كتير
لان معظم أعماله موجهه لفئة معينه … الأطفال
وموجهه لحل مشاكل معينه … الأسرة والبيت
والمنتجين الأيام دي محتاجين حد يقدم ما هو عكس ذلك

كان عبقري في فيلم ساندوتش عيال
قلت وقتها انه حط ايده علي قضية مهمة اوي
الاطفال اللي بتضيع نتيجة الحياة الغير سوية بين الأزواج
وكان من المرات القليلة اللي في عمل فني بيلقي الضوء علي النقطة دي بشكل مختلف
ان الازواج بيرفعوا قضايا علي بعض
في حين ان الطفل .. اكبر المتضررين
هو اللي من حقه يرفع قضية عليهم
لانهم بيدمروا حياته ومستقبله في حالة لو انهم ماكانوش اسوياء في علاقتهم

حتي فيديوهاته علي تيك توك مع بنته ربنا يحميها .. حاجات لطيفه محترمة أسرية
تحب تتفرج انت وولادك عليها من غير ما تخاف من حاجة تجرحهم

سامح حسين عامل في رمضان حاجة لطيفة اوي علي تيك توك اسمها قطايف
فيديوهات قصيرة مدتها دقيقة ولا دقيقتين
تسمعه بوجهه البشوش دا وهو بيكلمك عن الحياة
عن شريك الحياة
عن جمال نعم ربنا علينا
الصدقه وأهميتها في البركة في فلوسك

هادي .. سلس .. مريح
بيوصل فكرة في كبسولة
انتشر و عمل مشاهدات في هدووووء
تريند علي تيك توك حاليا
وأتمني ان كل دا يعطيه جزء من حقه
لانه زي ما قلت
نبته طيبه في أرض بور
تخيل حتي علي تيك توك
اللي بيكسب ويربح فيه المحتوي السئ
بيقرر يدخل ويشارك بمحتوي نضيف
وينجح ويسيب علامه مع الناس

منشور كده كان لابد منه
لان الواحد بيفرح لما بيشوف حاجة حلوة
عشان الناس بتقول انتوا مش بتشوفوا إلا الوحش
لا .. الكويس بيجبر أي حد يعترف انه كويس