لاااابد من التربية السليمة والتمسك بالدين والقيم الأخلاقيةوالاصول لتجنب الكوارث

كتب – عماد إبراهيم

واضح إن لسه قدامنا كتير عشان مانصحاش كل فترة على خبر لحادثة قاسية وغير إنسانية بتحصل وسطنا في مكان ما بأيادي ناس ماشافتش ريحة التربية وبيدفع ثمنها ناس تانية مالهاش أى ذنب!.. دي “نيرة أشرف”.. بنت مصرية بتدرس في الفرقة الثالثة كلية آداب جامعة المنصورة.. اتقتلت النهاردة الصبح على باب جامعتها وبإيد واحد زميلها لإنها رفضت تتجوزه لما اتقدم لها!.. اترفض فقرر يخلص منها!.. بالبساطة دي!.. الحقير اللي عمل ده اتمسك في لحظتها بس للأسف بعد ما كان عمل اللي عمله وحرم بنت لسه في بداية حياتها من حياتها!..

فئات كتير من المجتمع محتاجة إعادة تأهيل نفسي ورباية على كل المستويات.. ربوا عيالكم يا جماعة.. أرجوكم ربوا عيالكم وعلموهم يبقوا رجالة.. الأمخاخ القذرة اللي كتير منهم عايشين وسطنا مابقتش تعرف الفرق بين اللي يصح واللي ميصحش وبقى بالنسبالهم قلة الأدب وقلة الدين وقلة الأخلاق هما أساس التعامل.. الناس بتعرف تخلف وبتنسى تربي..

لو راجعت سبب أى مصيبة هتلاقي إن مربط الفرس فيها هو وجود “راجل” يستحق كلمة “راجل” سواء في البيت الفلاني أو في العلاقة الفلانية ولا لأ.. لو أنت أب “راجل” هتعرف تشد إمتى، وترخي إمتى.. هتعرف تستوعب بنتك إزاي، عشان تبقى أول حد تلجأ له لو عندها أزمة.. هتعرف تربي إبنك إنه يطلع “راجل” يوعد، ويوفي، ومايرميش بلاه على غيره، ويراعي ربنا في بنات الناس، ويصون أى بنت حتى لو مش من دمه.. البداية دايماً من عند “الراجل” يا بشر..

ربنا يرحم “نيرة” ويصبر أسرتها وكل حبايبها وينتقم من الحقير اللي عمل كده ويبرد نار أهل البنت بعقاب يستحقه يخليه عبرة.