“رسالة بعلم الوصول” بقلم / د.محمد ضباشه

رسالة بعلم الوصول

بقلم /د. محمد ضباشه

جاني جواب مِنَّهَا بخط هيروغليفي
محفور على نجمها مُزَيَل بتعريفي
مُرْسَلٌ بعلم الوصول بقاله ألفين حول
ما قام زمن يحمله أو طيف يجيبهولي
فيصحي فيا الشجن يترجم المكتوب
يغزل خيوط دنيتي وانسجها على كيفي
مَهْرَه ما فيش زيها ترمح تجيب النهار
وتفرقه على الولاد جوه بطون الدار
ترسم قلوب ع الشجر وتبسم الأزهار
اللي كواها الخريف وتلحفت بالنار
وتكون مع الليل سهر أعزف وغني لها
والقاني فى حضنها متهني بالمكتوب
يا عصر قوم دلني النجم فين القاه
ولا أنت بتهزني أنفض غباري وراه
لما شبابي اتنحل والشعر شاب مني
أحضن صباحي مسا واتلوى كاللبلاب
يمكن أطول السما والقاه فى ريحها جواب
يشفي فضولي الغبي أقراه ويقراني
ويكون لقلبي هوى أشم ربيعي فيه
أو بسمة فيها الدوى تحي اللى واقع فيه
والقاه نبي أو ولي مشتاق تشوفنى عينيه
يرحم تراب أشتكى من كتر احزاني
ويعيد زمانى بحور أرجع أعوم تانى
وارسى على شطها أفرش لها المنديل
وفى عز ليالي الشتا صحاني صوت هزني
رميت ورايا الغطا وقمت ولا همني
لقيت مراتي ف وشي والدموع نازلين
قالت : حرام حلمنا خلى العيال ضايعين
وناموا من غير عشا و خطوتين قدام
قوم البس الفاس مداس واعزق لنا فيها
واقطع شواشى الكسل وازرع حياة فيها
هى قانونها كده ما يكب على الفاضي
واللى يدوق حضنها ما يعدي م الماضي
ولا يشوف سعدها عايش يومين حلوين