معوض حلمي يكتب”العقدة اتحلت”

العقـدة اتحـلت

بقلم معوض حلمي/مصر

بيقول لي الحلم الهارب مني
أنا آسـف قلـبك ماعـرفـتوش
فبعاتب روحـي بقسـوه لإني
عـداني زمـاني ماحسيتهوش

أنا عيشت كتاف شياله هموم
علـشان مايميلش علينا جدار
سرقتني الغربه سنين بالكوم
ورجعت لقيتني غريب ف الدار

وأنـا مــؤمـن جــدا بالأقــدار
وراضي بأي نصيب في اللوح
بدموعي انا باكتم في الأسرار
وبالحـم أي جروح في الروح

وابويا ماكـــنش مـن التــجار
ولا لابس بدلـه وخاتم مـاس
انا شوفته بيزرع لينا خضار
ويبـوس الأرض بسـن الفاس

كان بيتوضى ويمشي يسبح
ويا مــلايكـة ربـه ان مـــروا
كان بيصـلي الفـجر ويسـرح
راكــــب ع العـــربيه الكـــارو

أبـويـــا الجــــاهل ماتعلـمش
ولا راح مدرسه ولا راح كتاب
وبرغم ظروفه الصعبه ماملش
ولا كان بيساند في الكداب

كان بيقـولي اتعـلـم واســمع
واوعـى تحـب الدنيا الفانـيه
كان شـاطر جـدا لما بـيزرع
أرض القــطن وشـط البامـيه

سايب ابويا سـهامه الراشقه
بعد مامات في القـلب بتجرح
لسه جسور الارض العاشـقه
لسـه سـنابل عـرقه بتــطرح

رباني وقاللي أوعاك م الخوف
مـادام الــرزق بإيــد مــولاك
كل ماتمـشي عينيك هاتشـوف
بين الــناس اهـــوال تمــلاك

إســعى وسـيبها لـرب الناس
ياما هموم كات حاضره وولت
لـو هاتنـام باللـــيل محـتاس
هاتصحى تلاقي العقدة اتحلت
ـــــــــــــــــــــــــــــــــــــــــــــــــــــــ
بقلمي الفلاح الفصيح /معوض حلمي
منشأة بطاش /تمي الأمديد / دقهلية