كتبت – اسماء السيد سامح
دي جمله هلاميه … بتوصف حاله بديهيه جدا … الا انها وبرغم من تفاهتها … بتعتبر طوق النجاه لأي شخص … انت بتحاول تقنعه انه يتغير
نفسي اسأل أي شخص … من معتنقي الجمله دي كوسيله لبتر اي محاوله اقناع بضرورة تغيير حياته
هو مين بس اللي يتقطع لسانه … ضحك عليك … وفهمك إن التغيير سهل ؟
يا افندم احنا هنا بنتكلم عن تغيير حياتك ؟؟؟
وكلمة ” التغيير ” معناها هنا … تغيير في تفكيرك .. في سلوكياتك .. في ايقاع حياتك كلها
مستوعب حجم الموضوع ومدى اهميته ؟؟؟
طب انا راضي ضميرك … هو ايه سهل في الحياه ؟؟؟
ده انت عشان تغير هدومك بتتعب … فما بالك بتغيير هدوم حياتك نفسها؟
مش عاوز تتعب حضرتك وانت بتغير من نفسك ومن حياتك … وانت بكل بساطه بتفضل تنهج 3 ساعات … لما بتغير فرده الاستبن في عربيتك !!!
يا سيدي … لو انت شايف ان التغيير صعب وكله اهوال ومخاطر … وها تتعب اوي عشان تتغير … يبقى خليك عايش في مشاكلك ومعاناتك … وافضل تجرع مراره الالم في صمت
واكتفي بنظرات الشفقه … وكلمات التعازي من اللي حواليك
بس رجاء خلي عندك الشجاعه الكافيه … واعترف .. انك تستحق هذه المعاناه … وانك جدير بالالم والتعاسه
لانك … كنت شخص سلبي وانهزامي … وفضلت انك تقبل العذاب والوجع طول عمرك … بدل ما تحارب ولو جزء من عمرك … عشان تنتصر لنفسك… وتعيش حياه مريحه وجميله
ارجوك لا تتهمني بالقسوه في احكامي … واعرف اني مش بعمل كده … عشان اتشفي فيك … لكن بحاول استفذك … بسعى اني افوقك … واخليك تنتفض على وضعك
لو كلامي ده حرك اي جزء من عقلك … وحبيت تتابع معايا المشوار … لازم برضوا اطمنك … واعرفك قوانين ثابته في الحياه
– مفيش حد سعى واجتهد انه يغير من حياته للافضل … الا وربنا وفقه … وفي النهايه بينتصر … وبيكون شخص افضل واسعد
– بناء الشخصيه المتزنه … القادره على تغيير حياتها … لازم يكون من خلال منهج علمي … فارجوك اهتم بدور العلم النفسي والعلوم الاجتماعيه … وبطل تعتمد على ارشادات المحيطين او تجتهد في وضع خططك الشخصيه … لانها في النهايه بتستنفذ طاقتك … لحد ما تتعب وتفقد اي امل في انك ممكن تتغير
– لازم تعرف ان التغيير مش وصفه بلدي بتشتريها من عند العطار … لا كورس دوا … تاخده اسبوع بانتظام … بعد كده تلاقي الحياه بقت وردي … التغيير الحقيقي محتاج 3 شروط عشان ينجح… ( فكر علمي واعي + اصرار + صبر )
في النهايه … بشكرك على قرايه المقال الطويل ده … وقصادك حلين … تقفل المقال وتنسى الموضوع …وتقوم تفتح التلاجه تاكل اي حاجه تلاقيها في وشك
او انك تقول لنفسك … ايه المشكله اني اجرب … واحاول اغير نفسي وحياتي للافضل … هاخسر ايه يعني لو حاولت
فقط للعلم … تعريف الفاشل … مش الشخص اللي حياته فاشله … انما هو الشخص اللي استسلم ورضي … بان حياته تكون فاشله
المزيد من القصص
النائب حسين خضير يجتمع برئيس مدينة شربين لبحث الملفات الخدمية ومطالب الأهالي بشربين
الجيل الجديد… عقلية مختلفة تصنع مستقبلًا مختلفًا
العام الجديد ليس وعدًا بالسعادة بل إختبارًآ للإنصاف