هجرس: تعديل قانون الإيجار القديم لازم يراعي حق المالك وفي نفس الوقت ميظلمش المستأجر

هجرس: تعديل قانون الإيجار القديم لازم يراعي حق المالك وفي نفس الوقت ما يظلمش المستأجر

كتب – أحمد أسامة 

أكد الدكتور “حسن هجرس“، مساعد رئيس حزب الجيل الديمقراطي وأمين عام الحزب بمحافظة الدقهلية، إن تعديل قانون الإيجار القديم خطوة مهمة جدًا، لكن نجاحها الحقيقي هيكون في قدرتها على تحقيق التوازن بين الطرفين، لأن فيه ملاك عندهم وحدات مش قادرين يستفيدوا منها بقالهم سنين طويلة، وفي نفس الوقت فيه أسر ساكنة في الشقق دي بقالها عشرات السنين ومفيش عندهم بدائل متاحة بسهولة.

وأوضح “هجرس” إن المشكلة مش قانون بس، لكن كمان لها أبعاد اجتماعية لازم تتاخد في الحسبان، علشان ما يحصلش تصادم ولا يبقى فيه ناس بتتضرر بشكل كبير. وقال إن فيه ناس ممكن تتأذى فعلاً لو تم تنفيذ أي تعديل فجأة ومن غير ما يكون عندهم فرصة يجهزوا نفسهم، خصوصًا كبار السن وأصحاب المعاشات وذوي الدخل المحدود.

واقترح مساعد رئيس حزب الجيل، إن أي تعديل لازم يكون فيه فترة انتقالية واضحة، والمدة دي تختلف حسب الحالة، وفي حالات ممكن الدولة تساعد فيها لو الناس غير قادرة فعلًا. وأشار إن فيه خبراء كتير اتكلموا قبل كده عن أهمية إننا نراعي البعد الإنساني، وقال إن الهدف مش إننا ناخد حق طرف ونسيب التاني، لكن نحقق قدر من العدالة يرضي الناس ويهدّي السوق العقاري.

وفي الأخير شدد على إن حق المالك لازم يرجعله، بس ده لازم يحصل من غير ما نحط المستأجر في موقف صعب، ولو التشريع راعى البعد الاجتماعي وحق الملكية، هنكون قدّمنا للمجتمع حل منصف.