7مناطق حرة جديدة تعيد ترسيم خريطة الاقتصاد المصري

تقرير – عماد إبراهيم

مصر داخلة على نقلة اقتصادية كبيرة جدًا و المرة دي بمليارات!

الحكومة المصرية أعلنت عن خطة قوية لإنشاء 7 مناطق حرة جديدة خلال الـ3 سنين الجايين، والهدف منها إن مصر تبقى مركز إقليمي للاستثمار والتصدير في الشرق الأوسط وإفريقيا.

بس يعني إيه مناطق حرة اصلا ؟

ببساطة المناطق الحرة هي مناطق صناعية واستثمارية بتاخد تسهيلات كبيرة، وإعفاءات ضريبية، وإجراءات أسرع، علشان تشجع المستثمرين ييجوا يشتغلوا في مصر ويصدروا منها للعالم

المناطق دي هتكلف حوالي 6.5 مليار دولار بمساحة حوالي 991 فدان، وبتستهدف صادرات سنوية متوقعة توصل لـ 2.35 مليار دولار، مش بس كده دي هتوفر آلاف فرص العمل الجديدة للمصريين

لكن ليه الخطة دي مهمة دلوقتي؟

لأن الاستثمار الأجنبي المباشر في مصر بدأ ينتعش بقوة، السنة المالية اللي فاتت دخل حوالي 12 مليار دولار، والحكومة مستهدفة توصل لـ 42 مليار دولار في 2025/2026، والمناطق الحرة دي هتكون عمود أساسي في الخطة دي

بس ياترى وضع المناطق الحرة حاليًا في مصر إيه؟

دلوقتي في 9 مناطق حرة (عامة وخاصة)، غير 11 منطقة استثمارية ومناطق تكنولوجية ومنطقة قناة السويس الاقتصادية.

المناطق دي فيها أكتر من 1200 مشروع، و استثمارات إجمالية حوالي 38.7 مليار دولار، ودول بيوفروا أكتر من 228 ألف فرصة عمل مباشرة

والأهم أن فيه 7 مناطق من أصل 9 شغالة بنسبة إشغال 100%، يعني المستثمرين واثقين في السوق المصري.

والحكومة علشان تسهل الاستثمار قللت المستندات المطلوبة، و عملت منصات رقمية، وسرعت التراخيص بنسبة 50%، وأطلقت حوافز نقدية ممكن توصل لـ 30% من قيمة الاستثمار في بعض الحالات

الـ7 مناطق الحرة الجديدة مش مجرد مشاريع دي خطوة كبيرة بتغير شكل الاقتصاد المصري كله، وبتأكد إن مصر ماشية في سكة استثمار حقيقي ومستدام رغم كل التحديات العالمية