نعمة وجودي

خواطر بقلم السيد عبود

في ناس كتير قوي في الدنيا ، كام واحد في العالم دلوقتي؟ كام واحد اتولد انهاردة؟ كام واحد اتولد من أيام سيدنا آدم؟

و انا واحدة من الناس دي، لو مكنتش اتولدت، لو مكنتش جيت الدنيا ولا ليا اي وجود، كان حيفرق في حاجة؟

كتير قوي لما الدنيا بتبقى صعبة، الواحد بيقول يا ريتني ما اتولدت، ولا كنت جيت الدنيا ولا ادخل جنة ولا نار، مكنش موجود وخلاص، مش كان يبقى أحسن، مش كان يبقى ارحلي.

بس ربنا سبحانه وتعالى مش بيخلق حاجة كده و خلاص، كل واحد في الناس دي كلها، ربنا عارفه و اختاره بالتحديد، و لو مكنش كده ربنا مكنش خلقه.

ربنا قرر وجودي ، عايزنى أنا بالتحديد، اختار شكلي و دوري في الدنيا ، ربنا عارفني.

ربنا قرر وجود كل واحد فينا، بس مش كلنا بنحس بقيمة القرار ده، مش حاسين بالنعمة دي.

الدنيا مش النهاية، احنا لسه في أول الحكاية. ربنا خلق كل واحد فينا عشان يكون معاه في الجنة، و عشان تكون معاه في الجنه لازم تكون معاه في الدنيا.

كفاية عليك نعمة اختيار ربنا ليك
كفايه عليك نعمه وجودك