كذبة اثيوبيا وابي احمد بيخدع شعبه أديس أبابا تعلن رسميا انتهاء الملء التاني

كتب – عماد إبراهيم

الحقيقة إن حكومة أبي أحمد بتتلاعب بشعبها بشكل مذهل، ومارست ضده خديعة تاريخية كبرى..

الموضوع كإن في فريق بيلعب ماتش عودة في بطولة، والمفروض يكسب بفرق 3 أهداف علشان يتأهل، فكسب 2 – صفر، وخرج يحتفل بالنصر لمجرد إنه كسب الماتش مع إنه خرج من البطولة..

ده اللي حصل بالظبط..
إثيوبيا كانت عايزة تخزن حوالي 13 مليار متر مكعب من المية في الملء التاني..
ورئيس الوزراء أبي أحمد شخصيا قال إن الملء هيتم في “يوليو وأغسطس”..

فجأة.. الملء اللي كان هيتم في شهرين خلص في أسبوعين!

مش منطقي إن كمية الأمطار تكون جت 4 أضعاف التوقعات، لكن الحقيقة هي إن إثيوبيا فشلت في الوصول للكمية اللي هي عايزاها، وتقديرات الخبراء زي د. عباس شراقي بتقول إنهم خزنوا 3 مليار متر مكعب بس، من أصل 13 مليار كانوا بيقولوا إنهم هيخزنوها..

ليه ده حصل؟
لإن في حاجة اسمها ممر أوسط في جسم السد، ده اللي كل ما بيعلى بتتخزن كمية أكبر من المياه.. وزير الري الإثيوبي ظهر في تصريحات من أسابيع وقال إنهم مش هيقدروا يعلوه لأكتر من 573 متر.. “المطلوب لتخزين الـ13 مليار تقريبا 595 متر”..

يعني فشل تام ومكتمل الأركان، بس اتصدر للإثيوبيين كنصر لمجرد إن المية عدت من فوق الممر الأوسط، حتى لو اللي اتخزن تقريبا 25% من المستهدف!

كإن الهدف هو الملء التاني لمجرد إنه يتقال “أنجزنا الملء التاني”، حتى لو ملوا كوبايتين وشفشق!

طبعا ده يفسر ليه الإدارة المصرية بتتعامل بهدوء تام مع الموضوع، احنا قدام تصرفات إثيوبية حتى الآن ماتخرجش عن إطار الدعاية والتوظيف السياسي لإنقاذ حكومة أبي أحمد..

لكن إنجاز حقيقي في السد.. مفيش..
بالمعدل اللي بيتم بيه الملء السنوي ده فهما محتاجين 20 سنة علشان يملوا الـ74 مليار.. ودي ضعف أكبر مدة كانت عايزاها مصر أو السودان في المفاوضات..

أمننا المائي في إيد أمينة..
وماحدش هيقدر يمس أمن مصر القومي..