عايزين نصيف ياماما

كتبت دينا عسكر

وأخيرا خلصنا مدارس امتحانات والحمد لله الاولاد نجحوا بتفوق ودخل علينا فصل الصيف بعشم جامد خلي الاولاد تفرهد من الحر وهنا اتفقوا وقرروا نطلع مصيف و بصراحة مقدرتش اعترض لان كمان مع النور اللي بيقطع خلاص ما بقيتش قادر استحمل الحر والرطوبة العالية
وجاءت اللحظة الحاسمة أننا نقول لبابا(زوجي) أننا محتاجين نروح نصيف وبعد تفكير تكتيك مني أنا والأولاد وحالي حال أي زوجة مصرية أصيلة تتسم بصفة الزن مقدرش يرفض ووافق وهو مغلوب على أمره وبنظره كلها هدوء وتسليم للأمر الواقع قالي: خلاص شوفي هنروح فين واحجزيلنا زي كل سنة
‏وفي اللحظة دي الفرحة كانت هتنط من عيون الاولاد وبكل سعادة وثقة سألتهم :

ها ياولاد تحبوا تروحوا فين السنه دي أحجزلكوا شرم الشيخ ولا الغردقة زي كل سنة.
‏ردوا عليا وقالوا : لا يا ماما احنا زهقنا عايزين نغير السنادي ونروح الساحل.
‏قولتلهم:ساحل….وماله ساحل ساحل اهه تغيير بردو .
‏ومسكت تلفوني و قررت اعمل سيرش (بحث) عن أفضل الأماكن الموجودة في الساحل وهنا كانت الصدمة ليه،
‏اكتشفت عالم تاني احنا منعرفوش بيستخدموا مصطلحات وطريقة كلام غريبة دول بيسموا الطعمية (جرين برجر) والملوخية(جرين سوب) وغزل البنات بقي اسمه(قطن كاندي)والزلابيه اسمها (جولدن دونتس )والبسين بقى (بووول)
‏ده غير الحفلات والسهرات اللي كلها انفتاح زياده عن اللزوم لقيت بنات وأولاد سنهم صغير جدا ممكن نقول في بدايه سن المراهقه بيسهروا و يشربوا و بيتكلموا عن الفلوس اللي بألوفات على أنها ملاليم .
‏وألبس…!!!! لبس ايه بس هو كان في لبس أصلا ممكن أقول عليه مجموعة من القماش صغيرة الحجم مجمعه على شكل ملابس ،
‏وكل شاب وفتاةبيتسابقوا مين اللي مش بيعرف يتكلم عربي كويس (عربي مكسر) وكل كلامهم بالإنجليزي عشان يبان كول اكثر وانهم من ايجيبت.

‏أنا مش عارفة اللي شفته ده بقي العادي والطبيعي ولا أنا اللي بقيت دقة قديمة ولا دي ستات نسيت تربي.
‏ولا بقى الويتر وطريقة كلامه وقرايه المنيو محتاجه حد يكون واخد دكتوراه عشان يفهمه( هههههه ويتر هو مش كان اسمه زمان جرسون ياله اشمعني ده يعني اللي هيفضل على حاله لازم يتغير زي ما كل حاجة أتغيرت )
‏وفوسط كل الاندهاش والأفكار المتناقضه اللي بتدور في دماغي افتكرت رواية كنت قريتها زمان للدكتور أحمد خالد توفيق اسمها (يوتوبيا )بتحكي عن مجموعة من الناس الأغنية اوي هتعيش في مكان خاص بها وباقي الناس هيكونوا خدم لهم ، بصراحه ماخبيش عليكوا خوفت وسألت نفسي ممكن ده يحصل والدكتور أحمد خالد توفيق كان عنده نظرة بعيده للحياة مع تطور الأوضاع الاجتماعية والاقتصادية .

‏صحيح نسيت أقولكوا بعد الصدمة اللي حصلتلي قررت مفيش مصيف السنادي واشتريت لهم بسين من اللي بيتنفخ ده اهم يلعبوا في الشقة براحتهم وتوفير وترشيد للنفقات ………وعجبي