كتبت _ مياده خالد
“بتقول ايه لما بتيجي سيرتي .. لسه بتتكلم عن غيبتي .. أنا عارفك بتهمك صورتي ”
_مارتحتش بعدي وبتعاني ومظنش خد حد مكاني … وانا اراهنك تقدر تنساني ..
بصيت ناحيتها وأنا بتمني أنها تكون موجودة بجد ، صح أن وجودها صعب بعد اللي حصل ، لكن اتمنيت …
“وحشتيني”
_ بعدت عني ليه؟
” لسه زي ما إنتي ، دايما بتعاتبي ”
_ عشان أنا بحبك ، عشان مينفعش أي موقف حتي لو صغير يمر مرور الكرام لأنه هيفضل مزروع جوايا بزعل وحزن منك وعليك ، بعاتبك عشان أنا مش عايزة مكانتك جوا قلبي تقل مللي واحد ، بعاتبك عشان انت حته مني مكنش ينفع أنك تمشي …
” مبقاش ينفع نكون سوا ، مبقاش ينفع تختاريني أنا ”
_ تعرف ..
من وانا لسه طفله كنت دايما بقول اني مستحيل أحب ، العالم كله مفيهوش شخص استثنائي عشان احبه يعني !
أول مرة اتقابلنا فيها متوقعتش ابدا اني ممكن أحبك ، الحب كان من وجهة نظري مينفعش غير لشخص استثنائي ، شخص غير الكل ، شخص مستحيل يكون اتخلق من الأساس ، لحد م جيت انت غيرت كل افكاري
أنا يوم م اختارتك انت دونا عن كل العالم دا لأني شوفتك انت الشخص الاستثنائي ، ويوم م ا ختارتك أنا اختارت ده ومشاعره وحبه ليا. .. فهمتني ؟
‘ حسيت بيها بتمسك أيدي وبتقربها ناحية قلبي ، حسيت بإبتسامتها ف ابتسمت ، هي تستاهل كل حاجه جميلة ف العالم
_ هات دي ، أنا دليلك وقلبك وعينيك
‘أخدت مني العصايه اللي معايا .. مشيت معاها وانا متأكد أن من الوقت دا عمري ماهتوه تاني ابدا .. أصل هي خير دليل فعلا … لو كنت لسه بشوف مكنتش هبقي متطمن زي دلوقت .. هي دليل ليا اكتر من نفسي ومن عيوني اللي مبقيتش بشوف بيهم .. مشينا شويه ووقفنا .. سمعتها بتتنهد
” جينا عند البحر … مش كده ؟ ”
‘حسيت ب ابتسامتها ..
_حسيت بالبرد ؟
” حسيت بقلبك اللي مليان كلام … بس خايف يكون مليان ندم ”
_ ندم !
” ندم ع رجوعك ف الوقت ده .. انا وانتي عارفين أن الوقت دا هو الوقت الغلط ”
_ من وجهة نظرك .. امته الوقت الصح ؟
” مبقاش في وقت صح خلاص .. مبقاش في وقت ينفع ترجعيلي فيه .. انا شخص ميؤوس منه .. ”
‘ اتنهدت من تاني وسكتت .. مسكت أيدي وقربت مني وميلت رأسها ع كتفي ..
_ هحكيلك حدوته .. حدوته بدأت بصورة و بكلمة ازيك ‘ …
‘ابتسمت وقربت أيدي من وشها عشان أحس ملامحها الجميله اللي محفورة جوايا ..
” إزيك ”
_ كأنك أول مره بتقولهالي ..
” ناقصنا حاجه واحده بس ”
‘ ابتسمت بهدوء
_ صورتي ؟
” المره دي مش هتقع منك .. والمره دي مش ه تكوني فيها لوحدك … بحبك ”
_ نمشي ؟
‘ تخيلت ملامحها زي م حفظتها واتعودت عليها .. خدودها اللي اكيد شبه الطماطمايه دلوقت .. ابتسامتها اللي تسحر .. عينيها اللي بتقفل مع ضحكتها ولونهم الصافي بعد م تبطل ضحك وتركز ف عيوني .. تفاصيل هتوحشني ..
” نمشي ”
‘ مسكت أيدي ومشيت جمبي ..
_ دبلتي خنقتك ؟
” مكنش ينفع تحكمك اكتر من كدا .. مكنش ينفع تربطك بيا ف وقت غلط ”
_ أنا مختاراك انت ف كل حالاتك .. انا بحبك ..
‘ ميلت ع دونها وهمست. .
” كأنك أول مره ب تقوليها ”
‘ بعدت عنها وكملت ..
” كل حاجه ليها وقتها .. اصبري ”
‘ مشيت لوحدي .. كان ليها حق تقف مصدومه بعد اللي سمعته مني .. الحب اللي بينا مش حب ينفع يهون علي اي طرف مننا .. بس هي كمان جميله اوي .. أجمل من انها تهون عليا وتكمل معايا ف اللي جي وانا عارف اد اي هو صعب ..
_ مش عارفه ليه اتغيرت .. يمكن خايف عليا .. ويمكن مش حابب وجودي جمبك .. لكن اللي متأكده منه أن عمرك م تكون كرهتني ابدا .. اللي بينا انا وانت مش قليل .. اللي بينا حب وتعلق وصورة وكلمة ازيك’
عارفه أنك مش هتقرأ المسدج وحتي لو ملفتش نظرك المزيكا المخصصة لرسايلي ف متأكده أن قلبك هيحس بيا وبكل حرف كتبته جوا الرساله من غير م تقرأها …
‘ مش عارف ازاي لسه عندها أمل اني أظهر تاني ف حياتها .. مر شهرين ع آخر مره اتكلمنا فيها … شهرين وانا مختفي تماما عنها .. لكن اعتقد أن حبنا يستاهل أن يكون عندها أمل لسنين قدام ..
_ متأكده انك هترجع ليا من تاني .. لأنك مش لغيري ابدا ❤
‘ قفلت المسدج وانا مبسوط جدا … 3 شهور وهي لسه بتبعت مسدجات دايما عشان تتطمن عليا رغم اختفائي الغير مبرر … فرحان ان أول حاجه اشوفها بعد م قدرت أشوف من تاني كانت رسالتها .. النهارده كان آخر يوم ف رحلة علاجي .. رغم النسبه الضعيفة جدا ف نجاح العمليه ألا أن ربنا كان رحيم بيا جدا
‘ خلصت أوراق المستشفي وروحت عندها .. كنت عارف ومتأكد اني هلاقيها هنا .. مكدبتش لما سميتها ” عروسة البحر ” ..
‘ فتحت موبايلي وبعتلها مسدج ‘
” انا جيت ليكي من تاني عشان مليش إلا قلبك يكون بيت ليا ”
‘ شوفت صدمتها لما قرأت المسدج .. مش متوقعه اني رديت عليها وانا مش بشوف ؟ او يمكن مش متوقعه اني رجعتلها من تاني !
‘ شوفتها بتكتب وتمسح كتير وهي متوتره ومش عارفه تقول ايه وبتبص ف كل اتجاه ف قررت انهي حيرتها ..
” دوري عليا ف قلبك الأول وهتلاقيني ”
_ انت موجود جمبي ؟
” انا موجود جواكي ”
_ حاسه بقربك ..
‘ مكنش ينفع نكمل شات ابدا … كان لازم احضنها واقربها من قلبي اللي اتعذب طول الفتره اللي فاتت من بعدها ..
” إزيك ؟ ”
‘ بصت نحيتي وهي ب ابتسامتها اللي تخطف وملامحها اللي وحشتني
_ كأنك لأول مره بتقولهالي ..
” ناقص حاجه واحده بس ”
_ صورتي ؟
” والمره دي مش هخلي الصورة دي ناقصها اي حاجه .. انا جمبك
‘ مسكت ايدها ولبستها الدبله من تاني وبوست رأسها وميلت ع ودنها وهمست ..
” و دبلتي نورت ايدك من تاني ”
More Stories
عاوزا الجوفايا دي أوزنها لي يا ابني
مالا تعرفه عن المرأة القرد
الزواج ومسئولياته