بوابة الشرق نيوز في حوار خاص وحصري مع فنانة الصعيد

  • فاطمة أنور
  • 20 يونيو 2021
  • 556
بوابة الشرق نيوز في حوار خاص وحصري مع فنانة الصعيد

حوار _ حمادة علاء الدين

 

هي ( شهد محمود عبد العزيز ) فتاة لم تتجاوز السادسة عشر من عمرها من اقصي الصعيد تحديدا ” محافظة الاقصر ” لاقت ما لاقته من معاناة لفتاة في مثل سنها حتي حدثت لها حادثة قلبت موازين حياتها واتجاهاتها وكان لدعم اهلها لها ماهي فيه الان وكان لنا معها هذا الحوار الخاص والحصري:

_ ممكن تعرفي نفسك؟
* شهد محمود عبد العزيز،، ١٦ سنة،، اولي ثانوي موسيقي عربية بالمعهد العالي للموسيقي العربية من محافظة الاقصر.

_ منذ متي بدأت موهبتك بالغناء؟
* كان عندي ٩ سنين لما طلعت علي مسرح اول مرة ،، واحترفت الغنا علي ١٣ سنة.

_ كيف استقبل اهلك وخاصة انكِ من اقصي الصعيد وهنالك البنت لا يجوز لها امتهان هذه المهن ؟
* الموضوع جه بحادثة،، جالي ارتجاج ف المخ ونزيف داخلي وشلل ف العصب السادس،، اثرت علي عيني اليمين تأثير غير طبيعي،، وأثرت علي نفسيتي جامد جدا،، اخدت سنتين علاج مفيش فايدة،، وفقدنا الامل انا واهلي ان عنيا ترجع زي الاول،، لحد ما ربنا بعتلنا معجزة وكانت دكتور ( شريف علوان ) اول ما شافني حدد معاد العملية علي طول،، حادث من بين مليون بيحصل لواحد او اتنين وكنت انا منهم،، عملية دقيقة وصعبة ونادرة والحمد لله كانت ناجحة،، بعد كده كان لازم استرد ثقتي بنفسي لاني كنت مهزوزة ومكنتش بكلم حد ولا اروح المدرسة،، ماما قالت اني لازم اغني هي اللي كانت داعم ليا في كل خطوة،، وانا وافقت،، ورحت عملت اختبار ف قصر الثقافة ونجحت،، وطلعت حفلة لايف علي طول.

_ مين اكتر حد كان داعم ليكي في مجال الغناء؟
*الي دعمني ووقف جمبي وكان مؤمن بيه ودخلني طريق الاحتراف هو مستر( سامح معروف )،، علشان ارجع ثقتي في نفسي،، هو الاب الروحي ليا

_ ايه الحفلات اللي شاركتي فيها؟
* كل الحفلات الوطنية كنت بشارك فيها،، وامام كبار رجال الدولة،.

_ طيب ايه اكتر موقف عمرك ماتنسيه في بداية طريقك للغناء؟
* اكتر موقف اثر فيا كانوا مكلميني علي حفلة قبلها بأسبوع واني هغني صولو ف الحفلة دي كانت قدام وزير الثقافة السابق وف اليوم ده واحد اخد مكاني،، خلصت الحفلة وفضلت اعيط وعملت مشكلة وكلهم فضلوا يقولولي عادي احنا مش بنطلع صولو،، ومش عارف،، ايه اتكسرت قوي او ماطلعتش مجبوره الخاطر بعدها،، واللي حصل كان شبه متفق عليه،، بعدها بشهر ونص بقيت مطربه الباند،، ومن ساعتها ماروحتش قصر الثقافه تاني،، ووقفت بعدها علي رجلي،، واثبتلهم ان الدنيا مش هتقف عليها.

_ طيب ايه احساسك وانتي يعتبر اول واصغر مطربة من الصعيد تقف علي خشبة مسرح ساقية الصاوي قريبا،، بعد الدعوة التي وجهت ليكي لاحياء حفل هناك؟
* بصراحه لغايه دلوقتي مش عارفه اوصف احساسي بس اللي هو،، اهو انا تعبت قوي،، وربنا بيكرمني وبيعوضني خير.

_ مين مثلك الاعلي في الغنا والموسيقي؟
* الفنانة انغام.

_ ايه طموحاتك المستقبلية لحياتك عموما؟ وحياتك الفنية خاصة؟
* اكون دكتورة ف الموسيقي،، ويكون معايا مركز ف الصعيد اعلم فيه الموسيقي لكل اللي نفسه يتعلمها ومش قادر يسلك طريقه،، يعني انا تعبت جدا عشان من الصعيد ومغتربة حاليا ليا ١٠ شهور ماشوفتش اهلي غيري مش هيعرف يعمل كده.

_ كلمة توجهيها للشباب والفتيات في مثل عمرك؟
* بقولهم حاربو علشان احلامكم واوعوا حاجة تهزكم،، ومهما وقعت لازم تقف تاني واقوي من الاول.