1 يوليو، 2022

الشرق الأوسط نيوز

آخر الأخبار تعرفونها فقط وحصرياً على الشرق الأوسط نيوز موقع اخباري شامل يدور حول العالم

ليه يازمان

بقلم ماجدة البهيدي

 

وحيد من جوه متكسر
ده عودي لسه كان اخضر
طول عمري وحدي شايل الهم
وعلى الجبين ده متقدر

من صغر سني وشعري اهو شاب
لا ليا احباب ولا ليا أصحاب
والدنيا بتشيل فيا وبتحط
ولا جه في يوم الحزن وغاب

طب ليه ده كله بيجرالي
ولا حد يوم حس بحالي
بشيل هموم وحمول الناس
ولا لقي حد يكون جاري

بقيت انا والهم اصحاب
إن غبت يوم بيدق الباب
يقولي متخفش يا صاحبي
هفضل ساقيك كل العذاب

الهم لي ماشي في ضلي
ولا لقي صاحب لي فاضلي
كل الصحاب طلعت ميلة
مش لقي غير همي فضلي

الدنيا ليه جايا عليا
مش لقي منها الا قاسية
ويوم ما تنوي تفرحني
تجيني وتبكي عينيا

الدمعة مليانة في عيني
ولا لقي حد يواسيني
حتى اللي قولت عليه خلي
اول واحد بيبكيني

بكفاية بقى مر كفاية
يا دنيا ليه معنده معايا
سقياني ليه المر كاسات
وعمالة بتصبي ورايا

بشرب وعمال اقول عادي
اهي بكره تيجي وهتدادي
وانتي ولا دارية بحاجة
و سيباني في الناس وتدادي

هات اللي عندك يا زماني
بالكوم وعبي في احزاني
خلاص مافيش غيري في الدنيا
اه من الزمن واهين ياني

اضرب كمان و اضرب فيا
هات الهموم وارمي عليا
الكل باعني وراح عادي
مش فارقة مين جاي عليا

على كل لون شوفت قاسية
حتى الصحاب غدرت بياه
بعدين معاكي بقى يا دنيا
بشويش وبراحة عليا

لي يا زمان ده مفيش اخر
وشربت انا الكاس للآخر
حرام عليك سبني في حالي
بكفاية دانا جبت الاخر

مجتش يوم وصعبت عليك
القلب فاض الله يخليك
والدمع سايل ليل ونهار
طب مرة عندي ومرة عليك

حبايبي بكولي عيوني
وفي نن قلبي وجرحوني
مع اني كنت انا شاريهم
وفي ثانية راحوا ولا جولي

هو الفراق كدة بالساهل
دانا والله قلبي ما يستاهل
بكل إخلاص انا حبتهم
وباعوا العشرة بالساهل

الله يسامحك يا نصيب
بالاسم كان هو حبيب
قال جاي تاني يبكيني
ويروح ويرجع و يغيب

  1. :